Pakistan eptute'n Islamabad panin kawng zawh

Pakistan prime minister Imran Khan kaihhruai sorkar duh lohna lantirin, Inrinni aṭang khan eptu pawlte chuan an ram khawpui, Islamabad panin kawng an zawh.

PM Imran Khan rin tawk lohna motion hi Parliament-ah put luh a ni tawh a, tun kar chhung hian ngaihtuaha vote lak a ni ang.

Lahore khawpui aṭangin Inrinni khan PM hlui Nawaz Sharif-a party, Pakistan Muslim League-Nawaz (PML-N) party thlawptute chuan Islamabad pan hian kawng an zawh ṭan a ni. An zingah hian Sharif-a fanu, Maryam Nawaz pawh telin, "Islamabad kan thlen hmain PM hi a bang ngei ang," a ti. PML-N mi leh state hian Punjab province-a khawpui hrang hrang aṭangin kawng an zawh ṭan ve bawk a, Islamabad thleng tur hian km 300 chuang an kal a ngai dawn a ni.

Jamiat Ulema-i-Islam (F) party hotu Maulana Fazl-ur-Rehman leh an party worker sang tel pawhin Islamabad-ah hian PM Imran Khan duh lohna lantirin kawng an zawh bawk.