England-in khuahkhirhna khauh zawk kalpui tum

Covid-19 hri leng thawh hnihna thleng vangin England ramah lockdown hman mek a ni. Lockdown hi December 2-ah tawp dawn a, hemi hnu hian inkhuahkhirhna khuah zawk three-tiered system chu hman chhunzawm a ni dawn.

November thla tir khan UK prime minister Boris Johnson chuan England-ah Covid-19 hri leng thawh hnihna a thlen mek avangin leh hri kai an tam chhoh bakah thi an pun belh zel avangin lockdown a puang a ni. 

Johnson-a scientific adviser-te chuan lockdown chhunga khuahkhirhna hman chu a khauh tawk lo niin an sawi a, inkhuahkhirhna khauh zawk hman a ṭul thu Johnson hi an hrilh a ni. 

Hei vang hian sorkar chuan lockdown zawha hman tur inkhuahkhirhna khuah zawk three-tiered system chu hman a tum niin media-te chuan an tarlang. He system-ah hian chhungkaw dang nena awm ho phal a ni dawn lo a, indoor-ah paruka chin bak inhmuh khawm khap niin; pub, bar leh mipui inhmuhkhawm theihna te chu khar tur a ni.

Hemi chungchangah hian nimin khan PM leh a cabinet-te chuan sawihoin, vawiinah Parliament-ah ruahmanna siam hi pharh a ni ang. Ruahmanna an siamah hian Krismas vuakvet pawh a huam tel ang. 

Hetih lai hian eptu lam chuan khuahkhirhna khuah zawk siam tumna hi an dodal rin a ni a, dawr leh sumdawnna hmunte khar leh a nih chuan hna nei lo leh leiba nena awm tawh mi tam tak tan harsatna a thlen zual dawn a ni, an ti. Mahse sorkar lam chuan hri kai darh zel tur hi an veng lo a nih chuan an ram economy in nasa takin a tuar dawn a ni, a ti thung.