Iran-ah partial lockdown leh curfew puang
Iran sorkar chuan an rama Covid-19 hri leng vangin partial lockdown leh curfew a puang a, hei hi November 28, Inrinni aṭangin hman ṭan a ni ang.
Official-te chuan khawpui hrang hrangte chu Covid-19 hri kai vanga damdawi-ina enkawl ngai awm zat , an tam dan azirin rawng (colour) hmangin a thliar a ni. Rawng var-a dah chinte chu hlauhthawnawm loh tih an nih laiin, rawng sen pekte erawh chu hri darh zualna, hmalak ngaihna hmun an ni thung.
Rawng sena chhinchhiahte chu kar hnih chhung tal partial lockdown hnuaiah dah an ni dawn a, non-essential business te khar vek niin, sorkar office-ah pawh thawktu awm zat aṭanga hmun thuma ṭhena hmun khat chauh kaltir an ni ang.
Iran sorkar chuan pawn chhuahnaah mipuite chu hmaituamna hmang ngei ngei turin a phut. Hri tih damna leh invenna tur thil dang a awm rih lo tih sawiin, hmaituamnna ngai pawimawh turin mipuite a hriattir.
Kar liam ta Inrinni khan Iran-a Covid-19 vanga thi hi darkar 24 chhungin mi 431 an awm a, hemi ni vek khan hri kai thar mi 12,931 an awm bawk. Iran-a Covid-19 hri kai hmuh chhuah tawh hi mi 8,41,308 an awm a, an zinga mi 44,327 in an thihpui tawh a ni.
November 16 kha Iran-a Covid-19 vanga thi tam ber ni a ni a, kha ni khan mi 482 an thi tih thuneitute chuan an tarlang. Heng te avang hian Iran sorkar chuan Inrinni aṭanga hman tur inkhuahkhirhna hi a siam phah ta a ni.