Trump-an Putin nena meeting neih tur ṭhulh maithei

US President Donald Trump chuan Russia President Vladimir Putin nena summit an neh tur chu Sea of Azov-a Russia leh Ukraine te an intihthiam loh vangin ṭhulh a ni maithei tih a sawi.

Trump leh Putin-te hi tunkar tawp lamah Bueonos Aires, Argentina-a G20 summit neih kar lakah inhmu tura tih an ni. Mahse Russia-in Sea of Azov-a Ukraine lawnglian pathum a mansak chungchangah US national security adviser-te chuan report an buatsaih mek a, he report azir hian meeting neih leh neih loh tur hi ngaihtuah a ni dawn a ni.

Ukraine President Petro Poroshenko chuan Azov tuipuiah Russia nen intihthiam lohna an neih hnuah, ramri-ah Russia chuan sipai tam zawk a dah nghal bakah, tank-te pawh a let tum zetin a dah belh niin a sawi.

Pathianni khan Russia sipaite chuan Ukraine navy lawnglian pathum chu Sea of Azov-ah hian mansakin, Crimea tuipui kamah a hreng zui a, Ukraine sailor 24 an man tel bawk. Thawhlehni khan Russia-in a awp, Crimea biala Simferopol court chuan sailor zinga 12 chu an thubuai ngaihtuah a nih hma thla hnih tang turin a lo ti tawh bawk.

Ukraine chuan sailor mante hi chhuah turin Russia a phut a, khawthlang ramte chu Russia hrekna na zawk siam turin a phut nghal bawk a ni.

US State Department chuan Russia chetdan chu a dem thu sawiin, hei hian Ukraine nen an inkar boruak a tichhe zual dawn niin a sawi a, an thawhpui Europe ram dangte pawh Ukraine ram pui tura nasa zawka hma la turin a ngen.

Hetihlai hian Russia President Vladimir Putin chuan Ukraine lawng mansak an nih chungchangah Russia sipaite chuan an tihtur an ti niin a sawi thung Putin chuan Ukraine lawngte hi Russia tuipui chinah lutin, Russia patrol boat-ten ding tura an ngenna pawh an zawm duh lo a ni, a ti. Hei vang hian Russia sipaite tan chuan lawng lo mansak mai loh chu tih tur dang a awm lo a ni tia sawiin, sipaite chuan an hna an thawk mai a ni, a ti.