Sri Lanka sipai hotu court-ah inpe

Sri Lanka sipai hotu Admiral Ravindra Wijegunaratne chu hun eng emaw chen a bikbo hnuah Nilaini khan court-ah a inpe.

Admiral Ravindra Wijegunaratne hi an ram tualchhung indona thleng laia ṭhalai 11 rukbo leh thah an nih chungchang thupbo tumah puh a ni a, hei vang hian manna tur thupek pawh ṭum thum lai tihchhuah hman a ni. Mahse Wijegunaratne hi a inpe duh mai lo a, manna tur thupek tihchhuah a nih hnuah pawh President hnung zuiin Mexico-ahte a zin a ni.

Sri Lanka tualchhung indona thlen lai hian sipaite chu civil mite chungah rawng taka che leh, an dikna chanvo palzut sakah puh an ni. Sipai hotute chu pawikhawihna lian tham tak takah inhnamhnawiha puh ni mah se thubuai siamsak theih loha hum an ni.

Nilaini-a court-a a inpek hian Wijegunaratne chuan tualthahna thleng chungchanga mawhphurtu ber, naval intelligence officer Chandana Prasad Hettiarachchi humhim a tum nia puhna chu thu dik lo a nih thu a sawi.

Tualthahnaah hian Wijegunaratne hi tel ve lo mah se, pawikhawihtu ber Hettiarachchi-an man a pumpelh theih nana Malaysia-a a zinna turin a pui nia puh a ni a, mahse Hettiarachchi hi kumin August thlaa an rama a kir khan man a lo ni tawh a ni.

Tualchhung indona thlen la hian sipai official eng emaw zat chu civil mite ruboa hrengin, a tlanchhuahan tura sum tam tak phut ṭhinah puh an ni. Intelligence officer ṭhenkhat pawh president hlui, Mahinda Rajapakse sawisel ṭhin journalist-te thata puhna thubuai pawh siamsak an ni tawh bawk.