Ukraine-in civil mite thiarchhuah hna titawp lailawk

Ukraine sorkar chuan Russia-in an ram khawpui a beih meka civil mite thiarchhuah hna a thawh chu nimin khan a titawp lailawk.

Deputy prime minister Iryna Vereshchuk chuan civil mite thiarchhuah hna tihtawp a nih chhan hi sawiin, Russia sipaiten kawng lakah an bei thut thei nia intelligence report an dawn vang a ni tih a sawi.

Russia sipaite hian an beih leh an hual mek, Maripol, Summy leh Ukraine khawpui Kyiv daia khaw danga chengte chu hmun him lama an insasengna turin kawng ruahman sak an ni. Mahse Russia sipaite hian heng khawpui aṭanga tlanchhuah tumte danna tur hian a bei chhunzawm reng niin Ukraine lam chuan an sawi a ni.

Mauripol-a chengte Russia lama hruai luiah puh
Ukraine Deputy CM Vereshchuk chuan Mauripol khawpuia cheng, civil mi eng emaw zat chu Russia ram china hruai lut luiah Russia a puh.

Civil mi 40,000 vel chu Ukraine sorkar lam thawhpuina leh hriatpuina tel loin, Russia hian a ram chinah a hruai lut niin Vereshchuk chuan a sawi a, satellite image aṭangin Mauripol khawchhak lam, Bezimenne-ah heng mite awmna tur temporary camp pawh siam niin a lang bawk.

City Council chuan khawpui aṭang hian civil mi nuai 1.4 vel chu an tlanchhuak tawh a, hetih lai hian khawpui chhunga mi nuai 1.7 vel an la tang mek niin a sawi. Russia sipaite hian lawngchawlh hmun pawimawh, Mauripol khawpui hi lak tumin kar thum chhung an bei tawh a, khawpui chhung pawh a kap chhe nasa tawh hle. Khawpuia cheng mi tam takin ei lei in, tui leh damdawi lam pawh an tlachham ṭan tawh niin an sawi.

Russia-China inlaichinna a chak ṭhat lai ber a ni - Lavrov
Russia-in Ukraine a run avanga khawthlang ram hrang hrangten Russia an hrek chhoh mek laiin, Russia leh China inlaichhina chu a chak ṭhat lai ber a ni, tiin Russia foreign minister Sergei Lavrov chuan nimin khan a sawi.

China hian Russia hrekna siam a tum loh thu leh, ram pahnih inkara insumdawn tawnna pawn dan pangngai anga a kalpui chhunzawm tur thu a lo sawi tawh a ni. Ukraine chunga Russia chetdanah a demna thu a la sawichhuak lo a, Russia demna resolution siam chungchang vote lakah pawh a la hai zel a ni.