US leh Philippines-te'n military drill nei

US leh Philippines sipaite chuan nimin aṭang khan ram pahnihte joint military drill lian ber chu Philippines rama Luzon thliarkarah an nei ṭan.

Ram pahnihte hian kum tin joint military drill hi an nei ṭhin a, mahse Covid-19 hri len hnuah erawh an nei mumal thei ta lo a ni.

Tun ṭum hi Philippines president kalchhuak tur, Rodrigo Duterte hnuaiah war game an neih hnuhnung ber tur a ni. Duterte hian a hmain he exercise hi tihtawpah a lo vau tawh a, China lama a hawi tak avangin US nena military deal an neih pawimawh ber a lo titawp tawh bawk.

Ni 12 awh tur joint military drill-ah hian Filipino leh American sipai 9,000 dawn an tel dawn a ni. Maritime security, amphibious operation, live-fire training, counterterrorism, humanitarian assistance leh disaster relief-ahte training an nei ang.