UNSC-in Afghan hmeichhiate school kal phalsak turin Taliban ngen

United Nations Security Council (UNSC) chuan Afghanistan-a roreltu, Taliban-ten hmeichhiate lehkha zir chhunzawm a khapsak chu pawi a tih thu sawi nawn lehin, zirlai hmeichhiaten zirna an chhunzawm leh theihna tura school kal phalsak thuai turin a ngen.

Pathiannia thuchhuah an siamah UNSC chuan, "Security Council member-te chuan Afghan mi tupawh, hmeichhe naupangte pawh telin, lehkha zir turin dikna an nei vek tih kan sawi nawn leh duh a ni," a ti.

Taliban-te hian high school zirlai hmeichhiate chu an zirna chhunzawm phalsakin, an tan school hawn a ni tawh dawn tih a sawi hnuah, school an kal ṭan ni tura a ruat ni a thlenah an thutlukna siam hi sut lehin, school kal a phalsak leh lo a ni. Islamic law zulzuia hmeichhiate tana lehkha zir theihna tur ruahmanna hi siam a nih hma chuan school kal phalsak an ni leh dawn rih lo tih a sawi a ni.

US chuan Taliban-ten school hawn chungchanga thutlukna an sut leh avang hian Doha-a Taliban aiawhte nena meeting neih a, an ram economy dinhmunte sawipui a tumna chu a ṭhulh leh nghal tih official-te chuan an sawi.