Shanghai khawpuiah hri leng vangin lockdown puang

China rama khawpui lian ber, Shanghai-ah Omicron variant vanga Covid hri a darh chhoh leh vangin a tahtawlin lockdown an puang dawn.

City government chuan nimin aṭanga Zirtawpni thlengin khawpui chhung khawchhak lam bialah lockdown puan a ni tih sawiin, April 1 aṭangin khawthlang lamah lockdown hi puan a ni ve dawn tih a sawi.

Mi maktaduai 25 chenna, Shanghai khawpuiah hian tunhnaiah hri kai an pung chho chak hle a ni. China rama hri kai thar hi khawvel ram dangte ngaihtuah chuan la tlem viau mah se, kum 2019 kumtawp lama Wuhan khawpuia Covid-19 hri hmuhchhuah a nih hnua an rama hri a darh nasat lai ber a ni.

China National Health Commission chuan Pathianni khan ram chhung aṭanga hri kai 4,500 an awm belh thu sawiin, a ni hmasa aiin mi 1,000 in an tam tih a tarlang.

Khawpui eng emaw zat chu hri leng vang hian lockdown a lo ni tawh a, mahse Shanghai khawpui hi chu sumdawnna hmunpui leh China khawchhak lama lawngchawlh hmun pawimawh a nih avangin, an ram leh khawvel huap economy tana a pawimawh avangin full lockdown kalpui loh hram an tum tih official-te chuan an lo sawi tawh a ni. Mahse hri kai an pun tak zel avangin city government chuan khawpui chhungah a tahtawlin lockdown hi kalpui a ngai ta tih an puang a, hei hi hri darh zel tur titawpna tur a nih thu an sawi.

Nimin aṭanga April 1 thleng lockdown puanna, khawpui khawchhak, Pudong huam chhungah hian international airport leh financial district-te a awm. Lockdown puan chhung hian mipuite chu pawn chhuak lo tura tih niin, essential service-a thawk tih loh hnathawktu dang, sorkar hnathawk pawh huam telin in lam aṭanga hna thawk tura tih an ni.