Sri Lanka economy thlachhe nasa

Sri Lanka chuan sum lamah harsatna lian tak a tawk a, hun rei tak chhunga an ram economy chhiat ber lai an tawng mek.

Thil man nasa takin a sang chho a, sorkarin sum a nei mumal tawh lo a, an sum hmuhna pui ber pakhat tourism sector chu Covid-19 hri lengin a nghawng avangin thla eng emaw zat chu sum dinhmun chhe takah an ding tawh a ni.

Paper indaih lohna vangin school exam-te chu tiam chin awm loa ṭhulh a ni tawh a, an rama newspaper lian pahnihte chuan paper neih loh vang leh, thil man sang zel vangin kar liam ta aṭang khan chanchinbu an tichhuak thei tawh lo bawk.

February thla aia March thlaa ei tur lam chi man punna chu 25% vel a tling a, thla nga chhung chu a zawnin thil man a sang chho tawh a ni.

Oil lakluhna tur sum a neih mumal tawh loh avangin ram chhungah fuel indaih lohna a nasa hle a, hmun hrang hrangah power supply pek pawh tihtawp a ni fo ṭhin. Fuel tlem avangin an inchuh nasa a, petrol pump-ah fuel lak tumte chu rei tak tak intlar a ngai a, buainate a chhuah ṭhin avangin gas station-ahte buaina chhuak veng turin sipaite dah an ni hial.

Sri Lanka economy chhiatna chhan ber hi foreign currency a neih tawk loh vang a ni. Foreign currency reserve a neih ngah loh chuan fuel, ei tur leh bungraw pawimawh dangte a lalut thei lo a ni. Kum 2020, January thla aṭang khan foreign currency reserve hi 70% velin a tlahniam tawh. Ram dang aṭanga sum a lakluhna pui ber zinga mi, tourism chu Covid-19 hri lengin a nghawng avangin a sum lakluh hi a tlahniam tawh hle.

Ram dangte lakah leiba a ngah a, kum 2021-a a leiba hi USD tluklehdingawn 35 a tling a, heng a leiba neih zinga 10% vel hi China laka a ba a ni. Hetih lai mek hian China hi sum lama puihna, USD tld 2 pe turin a ngen mek. A sum hlutna pawh a tlahniam zel a, March 8 aṭang khan SLR 90 leh USD khat a inhu a ni.

Kum 2019-a Sri Lanka president atana lakluh, Gotabyaya Rajapaksa chuan a campaign laia a lo tiam tawh angin value-added tax 15% an lak ṭhin chu a zahve dawnah a tihniam a, hei bakah hian chhiah an lakna dang eng emaw zat a titawp bawk. Chhiah tihhniam hian sorkarin sum a hmuh tur tam takin a tikiang a, hei hian leiba ngah tak Sri Lanka economy-ah harsatna a thlen belh bawk.