Turkey-ah Russia leh Ukraine palaite inbia

Ukraine leh Russia palaite chu nimin khan Turkey khawpui, Istanbul-ah ramah an inbia a, hei hi kar thum dawn hnua ram pahnih palaite hmaichhana an inbiakna hmasa ber a ni.

A hmain ram pahnihte hian inremna kawng zawngin inbiakna ṭum thum an lo nei tawh a, engmah heng inbiaknaah hian inremna an siamthei lo a ni.

Turkey president Tayyip Erdogan chuan inbiakna an neih ṭan hmain ram pahnih palaite lawmna thu a sawi a, chhiatna thleng mek tihtawpna tur chu an kutah a awm tih a sawi.

Ukraine TV chuan ram pahnih aiawhte hian inlawmna chibai pawh inbuk loin inbiakna hi an ṭan niin a sawi. Ukraine leh US chuan he inbiaknaah hian thil danglam tak a thlen an beiseina a sang lo hle tih an sawi a, hemi rual hian inkahhai puan a nih theihna tura hma laknaah ram pahnih aiawhte hmaichhan ngeia an inbiak theih chu a pawimawh tih an sawi.

Indopui II-na hnua Europe ram inbeihna nasa ber thleng hi thla khat a tling tawh a, Ukraine aṭang hian mi maktaduai 3.8 vel chu ram pawn lamah an tlanchhe tawh a, mi sang tel thi leh hliam an awm tawh bawk. Hetih lai hian Russia-in Ukraine a run avanga ram hrang hrangten Russia an hrek avangin Russia economy dinhmun pawh a tlahniam mek bawk.