Pakistan : PML-N President Sharif-a'n PM Khan rin tawk lohna motion pulut

Pakistan Parliament, National Assembly rorel inkhawmah nimin khan Leader of Opposition leh PML-N president, Shehbaz Sharif chuan prime minister Imran Khan rin tawk lohna motion a pulut.

Deputy speaker Qasim Khan Suri chuan Parliament member-te chu he motion putluh duhtute chu an ṭhuthmun aṭanga ding turin a ngen hmasa phawt a, member 161 in motion put luh hi an thlawp avangin a remtih sak ta a ni.

Prime Minister rin tawk lohna motion putluh hi Ningani aṭangin sawiho a ni dawn a, putluh a nih aṭanga ni sarih chhungin vote lak a ni ang.

PM Khan hian Parliament-a fiahna paltlang tur hian vote 172 a hmuh a ngai dawn a ni. Hetih lai hian Pakistan Tehreek-i-Insaf (PTI) kaihhruai sorkar hnuaia an thawhpui zinga member 20 vel chuan PM rin tawk lohna motion thlawp lamah an vote dawn tih an sawi a, member 23 vel chuan eng lamah nge an vote dawn tih an la sawichiang lo thung. Mahse PM hian an PTI leh a thawhpui party-a legislator-te puihnain fiahna hi a paltlang ngei dawn tih a la sawi a ni.

Kum 69 mi, Pakistan national cricket team captain hlui, Imran Khan kaihhruai PTI hian kum 2018 inthlanpuiah khan hnehna changin, National Assembly-ah hian member 176 an nei a ni.