Sri Lanka Parliament-in PM office sum hman tur dansak

Sri Lanka Parliament chuan Prime Minister office-in sum a hman theih lohna turin a dansak.

October 26-a President Maithirpla Sirisena-an prime minister aṭanga Ranil Wickremesinghe ban a, a aiah Mahinda Rajapake a ruat aṭang khan Sri Lanka tualchhung politics hi a buai chho a ni. Wickremesinghe hian President-in a banna chu a pawm lo tih sawiin, parliament-ah pawh majority a la nei niin a sawi. Parliament-ah hian President-in PM atana a ruat thar Rajapakse hi ṭum hnih fiah ni tawhin, fiahna a paltlang lo ve ve a, hetichung hian a ni pawh a bang duh bik lo a ni. President-in a thlawp avangin Rajapakse hian Parliament-ah thlawptu ngah tawk lo mah se a cabinet tur ruatin, PM dinhmun hi a chelh chhunzawm lui a ni.

Parliament member tam zawkin PM thar Rajapakse hi an thlawp loh avangin, Ningani khan PM office-in sum a hman tur dansakna tur resolution pu lutin an pass zui nghal a ni.

Wickremesinghe thlawptute chuan PM atana Rajapakse dah a nih dan hi ram dan kalh a nih vangin, PMO pawh hna thawk thei loin, sum hmang chhuak thei loa siam an tum tih an sawi.

Hetihlai hian President Sirisena chuan Wickremesinghe chu Parliament member-ten thlawp vek mah se prime minister atan a pawm dawn lo tih a sawi. Sirisena hian Parliament hi ṭhiatin, nakkum January thlaa inthlan ṭhat buatsaih turin a ti a, mahse President thupek hi Supreme Court chuan a hnawlsak a ni.