SKorea-in DMZ kaltlangin NKorea-ah rel tlantir

South Korea chuan kum 10 chuang hnua a vawi khatna turin nimin khan North Korea nen an inri-na, Demilitarized zone kaltlangin North Korea ram chhungah rel a tlan luh tir.

NKorea-a rel tlantirah hian South Korean expert team an chuang a, anni hian NKorea ram rail network thuam ṭhatna turah an pui dawn a ni.

Korea ram pahnihte hian tunhnaiah an inkar boruak siamṭhat tumin hma an la mek a, an hmalakna zingah hian ram pahnihte inkara rel tlantir pawh a tel a ni. Hei hian intlawhtawn a tihawlsam phah bakah, ramri kaltlanga sumdawnna kalpui thlengin a awlsam phah beisei a ni.

South Korean expert 28-te hi ni 18 chhung chamin, NKorea rel kawng km 1,200 a thui leh railway infrastructure-te an enfiahsak dawn a, mahse kut erawh an thlak ve lo ang.

Korea ram pahnihte inkar boruakin ṭhat lam a pan mek lai hian NKorea leh US in inbiakna an neih tur erawh chhunzawm theih a la ni lo. NKorea leh US chuan kumin June thlaa an ram hruaituten Singapore-a summit an neih ṭuma nuclear ralthuam tibo tura inremna an lo siam tawh chungchang zawm lohah an inpuh tawn a ni.