US President hlui US President hlui George HW Bush a thi Nilaini-ah vui a ni dawn

US President hlui, George Herbert Walker Bush chu kum 94 mi niin kar kalta Zirtawpni zan khan Houston, Texas-ah a thi a, Nilaini hian vui a ni ang.

George HW Bush hi kum 1989 - 1993 chhung khan US President niin, US President 41-na a ni. President hlui sunna atan hian US ram puma official building-ah ni 30 chhung US flag chu a ngul chanve-ah zar an ni ang.

Bush hian Parkinson's disease veiin, kum eng emaw chen chu wheelchair a hmang tawh a, a hriselna ṭha tawk loh vangin damdawi-inah pawh a lo lut fo tawh a ni. Kumin April thlaa a nupui, Baraba Bush vui a nih hnuah khan infection vangin enkawl a ni a, hemi hnu hian a hriselna hian tlakhniam lam a pan zel a ni.

President hlui ruang hi vawiin hian US Capitol-ah lak niin, a pual hian National Cathedral-ah inkhawm buatsaih a ni dawn a, mipuiten zahna an hlan theih nan Capitol-ah hian a ruang hi Nilaini zing thleng dah a ni ang. Nilaini hian Washington DC aṭangin Houston-ah a ruang hi lain, St. Martin's Episcopal Churh-ah vuina inkhawm buatsaih a ni leh dawn a ni. Hemi hnu hian George HW Bush ruang hi College Station, Texas-a George H.W. Bush Presidential Library-ah phum a ni dawn a, thla sarih liamtaa thi ta, a nupui Baraba Bush-i thlan bulah phum a ni ang.

George HW Bush-a vuinaah hian President Donald Trump leh First Lady Melania Trump te an tel dawn tih White House thuchhuah chuan a tarlang a, President te nupa hi Baraba Bush-i vuinaah khan an tel lo a ni. Khawvel ram dang hruaitu eng emaw zat pawh an tel beisei a ni.

President Donald Trump chuan December 5, Nilaini chu ram puma President hlui Bush-a vuina ni atan a puang a, Bush-a zahna lantirna atan hian hemi ni hian New York Stock Exchange leh Nadqad te pawh khar an ni ang. President Trump hian Bush-a zahna lantir nan G20 summit an hmanna, Buernos Aires, Argentina-a press conference a neih tum pawh a ṭhulh a, Bush chu mi ropui tak, mi entawn tlak a ni tih sawiin, a uiawm hle a ni, a ti.

Ram hruaitu hrang hrang pawhin George HW Bush an ui thu hi an sawi. Queen Elizabeth II chuan United Kingdom tana ṭhianṭha leh thawhpui ṭha tak a nih thu a sawi, US President hlui Bill Clinton leh a nupui Hillary Clinton-te pawhin ram tana hun a thawhnate avanga an chungah an lawmthu sawiin, a bulah hun an lo hman ṭhin tawhte chu an ngaihlu hle tih an sawi. Soviet Union hruaitu hlui Mikhail Gorbachev chuan Cold War a tawp theihna tur leh nuclear ralthuam tihtlemna tura Bush-a inpekna leh a tha thawhte a fak thu a sawi a, mi ropui tak a ni, tiin a sawi.