Asia-ah Covid-19 hri kai mtd 100 tling tawh

Asia ram ṭhenkhatah Covid-19 Omicron sub-variant, BA.2 vangin hri kai an pung chho leh nasa a, nimin khan Asia khawmualpuia hri kai hmuhchhuah tawh chu mi maktaduai 100 an tling tawh.

Asia region-ah hian tun hnaiah ni hnih danah hri kai thar hi maktaduai khat chuangin an pung a, khawvel puma hri kai hmuh chhuah tawh zinga 21% chu Asia-a awm an ni.

South Korea, China leh Vietnam-ah BA.2 sub-variant vangin hri kai an pung nasa, hri kai thar zinga 86% vel chu he sub-variant kai hi an ni tih World Health Organisation chuan a sawi. South Korea hi chawhruala ni khata hri kai thar tamna ber ram a ni mek a, khawvel puma ni khata hri kai thar pali zinga pakhat zel awm ang an ni.

China-ah pawh hri kai an pun zel avangin Shanghai khawpuiah lockdown kalpui mek a ni. China-ah hian kuminah hri kai hi mi 45,000 chuang an awm tawh. An ram mipui 90% chu Covid vaccine pek ni tawh mah se, hei hian hri lakah hian a venghim zo lo a ni.

Hetih lai hian India ram bikah hri kai hmuh chhuah tawh hi maktaduai 43 chuang an awm tawh a, Asia rama hri leng hluarna ram dang pathum - Japan, South Korea leh Vietnam-a hri kai belhkhawm aiin an la tam zawk.

Covid hri kaihhnawiha thi hi Asia-ah hian makt-aduai khat an chuang tawh bawk.

Covid hri lengin naupang mtd 400 chuang a la nghawng
United Nations Children's Fund, UNICEF chuan Covid hri leng vangin ram 23-ah zirna in khar leh kal mumal loin an la awm a, hei hi zirlai naupang maktaduai 405 velin an la tuar mek a in, a ti.

Covid hri leng hi naupangten hriselna kawngah tuar na lutuk lo mah se, zirna in te hun rei tak khar a nih avangin an nunphung erawh a khawih buai hle thung. Kum 2020, March thla khan ram 150-in school an khar a, ram dang 10-a a ṭhen khar a ni bawk. Kum hnih hnu, kuminah ram 19 chuan school hi an la khar zui bawk. Hei bakah hian ram dang pali-ah school 70% khar a la ni tih UNICEF chuan a sawi.

UNICEF executive director Catherine Russell chuan hun rei tak school an kal theih loh avangin naupang tam takin an thil thiam tawh sate an theihghilh a, hei bakah school chawlhsan chhun-zawm tur pawh eng emaw an awm a rinawm thu a sawi bawk.