Imran Khan-a'n thlawptu ngah tawk tawh lo

Pakistan prime minister Imran Khan kaihhruai, Pakistan Tehreek-e-Insaf (PTI) sorkar hnuaia a thawhpui, Muttahida Qaumi Movement Pakistan (MQM-P) chuan Parliament-a PM fiah a nih hunah eptu lam a thlawp dawn niin tualchhung media-te chuan an tarlang.

Eptu pawl, Pakistan Peoples Party (PPP) chairman Bilawal Bhutto Zardari pawhin nimin zing khan eptu ṭangrual pawl leh MQM-te hian inremna an siam thu a twitter-ah a tarlang vek bawk.

Prime Minister Imran Khan rin tawk lohna motion hi Pakistan Parliament, National Assembly-ah put luh a ni tawh a, sawiho phawt a nih hnuah vote hi lak a ni ang. Vote lak hun tur hi sawichian a la ni lo.

Pakistan National Assembly-ah hian member 342 awmin, majority nei tur chuan member 172 thlawpna hmuh a ngai dawn a ni. PTI kaihhruai ṭangrual sorkar hian member 179 a nei a, mahse MQM-P in an thlawpna an hnuhdawh chuan member 164 chauh a nei tawh dawn a ni. Eptu lam hian thlawptu 177 an nei tawh tih an sawi.