Russia-in Ukraine a beihna tihnep intiam

Turkey rama Russia leh Ukraine palaiten indona tihtawp a nih theihna turin inbiakna an neih chuan awmzia a nei chho dawn nia ngaih a ni a, Russia lam pawhin Ukraine a beihna chu tihnep a tiam. Ukraine president Volodymyr Zelenskyy leh Russia president Vladimir Putin-te meeting neih theih dan tur pawh ngaihtuah a ni bawk.

Russia palaite chuan Instanbul-a inbiak thawh khatna an nei chu awmze nei taka kalpui a ni tih sawiin, he inbiakna hmang hian Russia-Ukraine indona thleng mek titawp theih dan kawng pawh a inhawn an beisei.

Ukraine palaite pawhin Turkey-a inbiakna an neihah hmasawnna hmuh tur a awm tih an sawi ve bawk.

Russia sipaite chuan Ukraine khawpui, Kyiv leh hmarlama Chernihiv khawpui an beih mek pawh tihnep an tiam a, Russia deputy defence minister Alexander Fomin chuan hei hi ram pahnihten inbiakna an neih meka inrintawnna an neih theihna tur leh, inbiakna neih chhunzawm zelna tura hmalakna a ni tih a sawi.