Covid hri vanga thi 43% in an pung

World Health Organization (WHO) chuan khawvel ram hrang hranga Covid-19 kai tlahniam zel karah kar hmasa chhunga hripui vanga thi 43%-a an pun avangin fimkhur turin mipuite a chah.

"January thla tawp leh March 2022 thla tir inkar chhung khan Covid-19 kai thar chuan tlakhniam lam a pan a, kar hnih hnuah hri kai hi an pung chho leh a ni. March 21-27 inkar khan, a kar hmasa aiin hri kai hi 14% in an tlahniam bawk a ni. Hetihlai hian hemi chhung vek hian kartina hripui thihpui zat chu 43% in a sang zawk a ni," tiin WHO chuan Nilaini khan a sawi.

Covid-19 vanga thi tam zawk chu United States leh Latin America rama mite an ni a, India-ah pawh thihpui ṭhahnem tak an awm bawk.

"WHO region paruk huamchhungah hian, hri kai thar mi maktaduai 10 chuang leh thihpui 45,000 chuang an awm a ni. Region zawng zawngah kar khata hri kai thar zatin tlakhniam lam an pan a, region pali ah hri vanga thi an tlahniam bawk a ni," tiin agency chuan a tarlang.

WHO chuan test neih zat titlem leh khuahkhirhna dang thlahdul ramte chu fimkhur tura chahin, an inthlahdul chuan hri leng nasa zawk darh tur venna kawnga hmalakna nasa taka a tih ṭhuanawp theih thu an sawi.

US, Canada, UK leh India bakah ram ṭhahnem takin Covid-19 khuahkhirhna leh inkaih hruaina zawng zawng deuh thaw an hlip hnuah WHO chuan fimkhur tura ngenna hi an tichhuak leh a ni. Hri leng chhuizui hna thawh tihnep chuan Covid variant thar hmuhchhhuah kawngah leh hri thar kan hmachhawn dan kawngah nasa taka kan hnufual phah theih thu WHO chuan a tarlang.

Hetih lai hian Omicron variant chu Covid hri leng darh nasa ber a la ni mek a, ni 30 liamta chhung hri kai thar zinga 99.7% chu Omicron kai an nih thu agency chuan a sawi. Delta leh Omicron strain inchawhpawlh an hmuhchhuah thar, Deltacron chu a hlauhawm zawk emaw inkaichhawn a awl zawk emaw tih finfiahna an neih loh thu WHO chuan a sawi.