Mexico President thar lalut

Andrés Manuel López Obrador chu kar kalta Inrinni khan Mexico ram president thar atan rinawmna thu tiamtira lakluh a ni. López Obrador hi kum 70 chhunga Mexico rama leftist president hmasa ber a ni.

Mexico Parliament-ah president thar lakluh inkhawm hi buatsaih a ni a, ram dang hruaitu eng emaw zatin an telpui a, an zingah hian US Vice President Mike Pence, first daughter Ivanka Trump leh Venezuela President Nicolas Maduro te pawh an tel. López Obrador-a ṭhian ṭha tak, British Labour party hruaitu Jeremy Corbyn pawh a tel a ni.

Kumin July thlaa Mexico president thlannaah khan Mexico City mayor hlui, kum 65 mi López Obrador hi thlan tlin a ni a, hei hi president inthlana a chuh ṭum thumna a ni.

President thar atana lakluh a nih hnua thu a sawiah, López Obrador chuan an rama eirukna umbo tura theihtawp a chhuah tur thu leh, mi rethei leh hnuaihnung zawkte dinhmun siamṭha tura a thawh tur thu a sawi.

Inthlan dawna a campaign au hlaah López Obrador hian an rama pawikhawihna hluar lutuk te, retheihna leh eirukna umbo a tiam a, hei bakah hian sorkar sum senral tam lutuk pawh tihziaawm a tiam bawk. Thlan tlin a nih chuan president thlawhtheihna hralhin presidential palace-ah chen a tum lo tih a sawi a, a hlawh pawh 60% a tihhniam a tum thu a sawi bawk a ni. Los Pinos-a President official residence chu public museum-ah leh a ni tawh bawk.

President term khat bak chuh nawn a tum loh thu sawiin, López Obrador chuan a thuneihna chan laiin mipuiten direct vote hmanga elected official dik tawk lote an paihthlak theihna tura dan siamṭhat a tiam bawk a ni.