Bangladesh EC-in PM hlui Zia-i nomination hnawlsak

Bangladesh Elec-tion Commission chuan December 30-a inthlan-pui neihnaa chuh tuma Bangladesh Prime Minister hlui Khaleda Zia-i nomination paper thehluh chu Pathianni khan a hnawlsak.

PM hlui Zia-i hi eriuk thubuai pahnihah thiam loh chantir a ni a, jail-ah a tang mek a ni. Bangladesh High Court chuan thiam loh chantir, kum hnih aia tam tang tura hremna pekte chu inthlanpuia an chuh a lo khap tawh a ni.

High Court-in inthlana a chuh khapsak mah se, Zia-i hian constituency pathuma inthlan chuh tum hian nomination paper a thehlut lui tho a, mahse EC thupuangtu chuan returning officer-ten a nomination hi an lo hnawlsak niin a sawi.

Bangladesh election dan hnuaiah candidate, inthlana chuh khapsakte hian EC tribunal-ah an appeal thei a, hei bakah commission thutlukna hi High Court-ah an khing let thei bawk. EC thupuangtu chuan Zia-i bakah candidate 15 dangte pawh chhan hrang hrang vangin candidate an nihna hi hnawlsak a ni tih a sawi bawk.

Zia-i hi kumin February thlaa Dhaka Special Court in Zia Orphanage Trust sum tihchingpena puhnaa thiam loh chantir a, kum nga tang tura hremna a pek hnuah khan jail-ah dah luh a ni. October 30 khan High Court chuan a hremna hi kum 10-ah a tihpun sak leh a ni.