Sri Lanka court-in PM anga Rajapaksa awm a remti lo

Sri Lanka court chuan President Maithripala Sirisena-an prime minister atana a ruat, Mahinda Rajapaksa chu Prime Minister anga a awm a remti lo.

Appeal court chuan Thawhṭanni khan Rajapaksa leh a kaihhruai sorkar lakah hriattirna hi tichhuakin, Prime Minister, Cabinet leh Deputy Minister anga an thawh khapsak an nih thu a sawi a ni.

Court hian Sri Lanka MP 122-ten Rajapaksa leh a kaihhruai sorkar an thlawp loh thu an thehluh behchhanin he thupek hi a tichhuak a ni.

October 26-a President Sirisena-an prime minister aṭanga Ranil Wickremesinghe ban a, a aia Rajapaksa a ruat hnu khan Sri Lanka politics hi a buai chho ṭan a ni. President hian PM thar tur a ruat hnuah Parliament term thla 20 zet la awm chu a ṭhiat a, nakkum January thlaa inthlan ṭhat neih turin thupek a tichhuak nghal bawk. Mahse Supreme Court chuan Sirisen thupek hi a hnawlsak a, Parliament special session pawh neih zui a ni bawk.

Wickremesinghe leh Rajapaksa te hian prime minister niin an inchhal ve ve a, Wicremesinghe chuan member 225 awmna Parliament-ah thlawptu a la ngah tawk tih sawiin, President-in PM anihna aṭanga a ban chu dan kalh niin a sawi. Parliament-ah hian Rajapasak hian fiahna a paltlang zo lo a, mahse hetichung hian PM a nihna ṭangin a bang duh chuang lo a ni.