Ukraine President-in Russia nena friendship treaty siam tihtawp tum

Ukraine President Petro Poroshenko chuan Ukraine leh Russia ten inremna an siam, Treaty on Friendship, Cooperation and Partnership chu tihtawp a tum a, he treaty tihtawpna tur draft law chu Parliament-ah a thehlut.

Kumin September thla khan Poroshenko hian kum 1997-a Russia nena friendship treaty an siam titawp tura National Securitry and Defence Council thutlukna lo siam tawh kalpuina tur thupek hi a lo siam tawh a ni. He inremna an siam hnuaiah hian Ukraine leh Russia hian an ramri te inzahsak tawn sak a, ramri buaina awm chungchang pawh boruak ṭha tak hnuaia chinfel an tiam a ni.

Mahse kum 2014-a Russia-in Ukraine khawchhak lam, Crimea bial a laksak aṭang khan an inkar boruak hi a chhe ṭan a ni.

November 25 khan Ukraine lawnglian pathum, Kerch Strail kaltlanga Black Sea aṭanga Sea of Azov-a kal tumte chu Russia sipaiten ramri paltlang nia sawiin an lo mansak a, hei hian ram pahnih inkar boruak a tichhe zual hle. Ukraine Navy chuan an lawng kal tur thu hi a hmain Russia pawh an hriattir lawk niin a sawi a, mahse Russia chuan report engmah an dawng lo nia sawiin, border guard-ten vawi tam tak warning an pek chu Ukraine lawng hian a ngai pawimawh lo niin a sawi thung.

He thil thleng vang hian Ukraine chuan kar kalta Nilaini aṭang khan Russia ramri bula bial 10-ah ni 30 chhung atan martial law a hmang zui a ni. President Poroshenko chuan martial law an puan chu indo an puanna a ni lo tih sawiin, Ukraine defence tihchakna tura hmalakna zawk a nih thu a sawi.