Iran missile test vangin UNSC meeting nei

United Nations Security Council (UNSC) chuan kar kaltaa Iran-in medium-range missile a enchhin nia sawi chungchangah France leh Britain ngenna angin nimin khan closed door meeting a ko.

US chuan Iran hian Inrinni khan UN resolution palzutin missile a enchhin niin a sawi. UN resolution hian Iran chu nuclear ralthuam phur thei missile enchhin a khap a ni.

France chuan Iran missile enchhin chu an ngaimawh hle tih sawiin, 2015 Iran nuclear deal chungchanga UN resolution 2231 palzutna a ni, a ti. Britain Foreign Secretary Jeremy Hunt pawhin missile test dan bawhchhiatna leh resolution ngaihpawimawh lohna a ni tiin, Britain chuan hetiang thil hi ti tawh lo se a duh thu a sawi.

Hetihlai hian Iran chuan missile programme a siam chu a defence lam tihchakna tur leh invenna tur chauh a ni tih sawiin, nuclear ralthuam phurh tirna tura hman an tum loh thu a sawi thung.

Iran-a US palai Brian Hook chuan European Union hnenah Iran missile program hrekna siam tur hian a ngen a, US Secretary of State Mike Pompeo chuan Brussels-ah EU hruaitute pawh a lo kawm tawh bawk a ni. US hi kum 2015-a Iran nuclear deal siam aṭangin kumin May thla khan a lo inhnukdawk tawh bawk a ni.