President Trump-an George HW Bush zahna hlan

US President Donald Trump leh First Lady Melania Trump-te chuan Thawhṭanni khan US Capitol-a President hlui, George HW Bush ruang dah chu tlawhin, zahna an hlan. Bush hi kar kalta Zirtawpni khan kum 94 mi niin a thi a, vawiin hian vui a ni ang. President hlui ruang hi Thawhṭanni khan Texas aṭangin Washington DC-ah hian lak a ni a, mipui tlawh theih turin a ruang hi Capitol-ah dah a ni. 

Vawiinah Washington National Cathedral-ah a vuina hun hman a ni dawn a, hemi hnu hian Houston-ah a ruang hi lain St Martin's Episcopal Church-ah vuina inkhawm buatsaih lehin, BCollege Station, Texas-a Bush Presidential Library-a a nupui Barbara Bush-i thlan bulah phum a ni ang.