Russia-in ruble-a pe duh lote gas supply contract titawpah vau

Russia president Vladimir Putin chuan Ningani khan natural gas lama sumdawnna lama rules thar siam chu ziakin a nemnghet. He dan thar hnuaiah hian an ṭhianṭha ni lo ram leh region, an gas leina man Russia pawisa, ruble-a pe duh lote contract chu tihtawp theih a ni ang.

President Putin chuan, "Vawiin hian thupek thar ka siam a, Russia rama natural gas lei duhte chuan Russian bank-ah ruble account an hawn a ngai dawn a ni. April 1 aṭangin heng account hi gas supply leina atan hman a ni dawn a ni," a ti.

"Hemi kaltlanga pawisa an pe thei lo a nih chuan a leitute'n harsatna lo tawk pawh nise anmahni lam thiam loh a ni ang. Tumahin a thlawnin thil min zawrh ngai lo a, a thlawnin kan ti dawn bik lo a ni," tiin a sawi.

Russia-in Ukraine a run hnuah khawthlang ramte chuan financial system chu Russia an hrekna hmanrua atan an hmang nasa a, an company-te ho pawhin Russia company leh mimal nena contract an lo nei tawhte pawh an tihhlawhtling zui duh lo a ni, tiin Putin chuan a sawi. US leh Europe-a Russia thil neihte khawih chet theih loha hrek a nih avangin, khawthlang ram pawisate an tana lo hman ve a ṭul a awm lo, tiin Putin chuan a sawi zui bawk.

Kawng hrang hranga hrek an nih avanga Russia financial system leh economy lamin a tawrh mek tihchakna turin Russia gas lei man chu ruble ngeia an dawn a ṭul thu Putin chuan a sawi a, ruble hmang hian ram dang nena insumdawnna rintlak tak siam an beisei thu a sawi a ni.

EU ram ṭhenkhatte chuan Russia-in gas lama sumdawnna chungchanga dan thar an siam duh lohna an au chhuah pui nasa nghal hle.