Sri Lanka President in kawta nawrh huaihawt zinga mi 45 man

Sri Lanka ramin economy lama harsatna nasa tak a tawh mek chungchanga lungawi lohna lantirin, Ningani khan president Gotabaya Rajapaksa chenna in kawtah mi tam tak an pungkhawm a, pungkhawm zinga mi 45 chu man an ni.

Mipui pungkhawmte hian motor-te an hal a, police-te nen innawr buaiin police pangain hliam an tuar bawk niin official-te chuan an sawi. Buaina chhuak vang hian Colombo North, South, Colombo Central, Nugegoda, Mount Lavinia leh Kelaniya Police Divisions-ah curfew puan a ni a, mahse nimin zingah khan curfew hi hlih zui nghal a ni

Lungawi lohna lantirte hi Sri Lanka President chenna inah luh an tum a, police-te chuan hnawhdarh nan tear gas leh water cannon-te an hmang. Mipui kalkhawmte chuan an ramin harsatna a tawh mekah President Rajapaksa chu mawhphurtua puhin, amah leh a chhungte zawng zawng chu bang vek tura an phut thu an aupui bawk.

Hetih lai hian President office chuan nawrh huaihawtnaa tharum thawhna thlentute, firfiak pawlte chu a dem thu a sawi. Ningania President chenna in kawta nawrh huaihawtnaa tel zinga eng emaw zat chu firfiak an ni, a ti.

Sri Lanka hian an ram din a nih hnua an ram economy chhiat lai ber a tawng mek a, ei tur leh nitin mamawh indaih lohna a nasa tawh a, fuel leh gas-te pawh an nei mumal tawh lo a ni. Fuel lakluhna tur foreign currency a neih loh avangin power supply pawh nitin darkar 13 tihtawp ṭhin a ni a, eng nei loin mi tam tak an awm tawh.

Sorkar chuan an harsatna tawh mek laka khaichhuak turin International Monetary Fund (IMF) puihna a dil mek tih a sawi. IMF thupuangtu Gerry Rice pawhin Sri Lanka Finance Minister nen inbiakna neih thuai a nih tur thu a sawi tawh bawk. Hei bakah hian Sri Lanka sorkar chuan India leh China hnen aṭangin loan a dil belh mek bawk a ni.