Pakistan PM rintawk lohna motion hnawl ; Thla 3 chhungin inthlan buatsaih a ni dawn

Pakistan National Assembly deputy speaker Qasim Khan Suri chuan prime minister Imran Khan rin tawk lohna motion put luh chu nimin khan a hnawl.

No-trust motion hnawl a nih hnuah, PM Imran Khan chuan inthlanpui buatsaih ṭhat a nih thuai theihna tura Parliament ṭhiat turin Preisdent Arif Alvi a ngen nghal bawk. PM ngenna angin President Alvi hian Parliament hi a ṭhiat nghal a, thla thum chhunga inthlan buatsaih a ngai dawn a ni. Pakistan Supreme Court pawhin President thutlukna hi a pawmpui ve nghal bawk.

Nimina Parliament inkhawmah eptuten PM rintawk lohna motion an put luh chungchangah vote lak dawnah, deputy speaker Suri hian rorel inkhawm hi kaihruai a ni. Suri chuan eptute motion putluh hi ram danpui nena inkalh nia sawiin a hnawlsak zui ta a ni.

Eptu hruaitu, Pakistan People’s Party (PPP) chairman Bilawal Bhutto Zardari chuan sorkar chu ram danpui kalha cheah a puh a, Supreme Court-ah an kalpui dawn tih an sawi. PM rintawk lohna motion an put luh chu ngaihtuah a, vote lak a nih hma chuan lungawi lohna lantir an tum tih an sawi bawk.

Pakistan khawpui, Islamabad-ah chuan eptute leh sorkar thlawptute inkara buainaa chhuah venthawn thilah punkhawm khapna thupek tihchhuah nghal a ni.

Parliament-a motion put luh a ni hma hian Imran Khan kaihhruai, Pakistan Tehreek-e-Insaf (PTI) hian majority a nei pha tawh lo a ni. Kar liam ta khan ṭangrual sorkar a thawhpui lian ber party chuan an MP pasarihte chuan eptu motion thlawp lamah an vote dawn tih an lo sawi tawh a, hemi hma hian rorellai party zinga Parliament member eng emaw zat chuan eptu thlawp lamah an vote tur thu an lo sawi tawh bawk.

PM Khan chuan an ram buaina punlun chhanah US chu puhin, Russia leh China chungchanga US leh Europe ramte a thawhpui ṭhat duh loh avangin eptute chu Washington nena ṭangrualin amah paihthlak tumah a puh.