Sri Lanka cabinet minister 26 te'n banna thehlut

Sum indaih lohna avanga talbuai mek Sri Lanka-a cabinet minister-te chuan Pathianni zan khan banna an thehlut vek tih education minister Dinesh Gunawardena chuan sawiin, curfew karah pawh sorkar laka lungawi lohna lantir an pung chho zel.

President Gotabaya Rajapaksa leh prime minister Mahinda Rajapaksa-te tiam lohin cabinet chuan banna an thehlut vek tih education minister chuan a sawi. "President-in cabinet thar a siksawi theihna atan minister zawng zawngte chuan banna an thehlut vek a ni," tiin he thutlukna hi an ram economy tlachhe mek siamṭha tura meeting an neih hnua siam an nih thu Gunawardena chuan a sawi.

Eitur, fuel leh damdawi lam indaih lohna lian tak avangin mi maktaduai 22 chuang chenna, Sri Lanka mipuite chuan harsatna nasa tak an tawk mek a, ram hruaitute lakah lungawi lohna lantirin bang turin an nawr a ni.

Cabinet member banna thehlut zingah hian Rajapaksa chhungkaw member pathum an tel a, Rajapaksa-te unau zinga naupang ber, financial minister Basil bakah an unau zinga upa ber agriculture changtu Chamal leh an chhungkhat sports minister Namal-te chuan banna an thehlut vek.

An ramin sum leh pai lama harsatna nasa tak a tawh mekah mipuite chuan President Rajapaksa chu bang turin an nawr a, mipui lungawi lo pungkhawmte hnawhdarh nan police-te chuan tear gas leh water cannon te an hmang.

March 31 khan PM mimal chenna in bula mipui thinrim pungkhawm avangin sorkar chuan state of emergecy a puang a, mahse heti chung hian mipuite chuan nitin mamawh leh power indaih lohna thlen chhanah Rajapaksa kaihhruai sorkar chu puhin lungawi lohna an lantir chhunzawm reng a ni.

Thil man sang leh an ram pawisa hlutna tlahniam chak tak avangin nitin khawsak mamawhte chu a to chak hle a ni. Buhfai kg khat Rs 200 leh wheat kg khat Rs 190-ah a kai tawh a, chini pawh kg khat Rs 240, milk power kg khat Rs 1,900-te niin, artui pum khat pawh Rs 30 man a ni tawh.