PM lailawk tur ruat hma chu Imran Khan PM a ni chhunzawm ang : Pakistan President

Pakistan president Arif Alvi chuan Pakistan Constitution, Article 224 A hnuaiah Prime Minister lailawk, caretaker ruat a nih hma chuan PM ni lai Imran Khan chuan a hna a chelh chhunzawm zel tur thu a puang.

"Imran Khan Niazi hian Constitution of the Islamic Republic of Pakistan Article 224 A (4) hnuaia caretaker Prime Minister ruat anih hma zawng chu Prime Minister a ni chhunzawm dawn a ni," tiin President Alvi chuan twitter kaltlangin a sawi. Ni 15 chhungin caretaker PM hi ruat a ni ang.

Eptu party-ten an ram parliament, National Assembly (NA)-a PM rintawk lohna motion an put luh chu deputy speaker Qasim Suri chuan a hnawlsak a, hemi hnu hian PM ngenna angin President Alvi chuan National Assembly hi a ṭhiat zui bawk. Motion hnawl a nih chungchangah hian Pakistan Army chuan politics-ah inrawlhna an nei lo tih an sawi nghal a ni.

Eptute chuan NA-a Deputy Speaker thiltih dan chu ram danpui kalh a ni tiin, Supreme Court lamah zualko an tum thu an sawi. Pakistan chief justice Umar Ata Bandial chuan Imran Khan thupek leh chet dan bakah, National Assembly ṭhiat tura President a hmin dan chungchang chu Court-in a la ngaihtuah tur thu a sawi.

Pakistan-ah hian kum 75 chhungin Prime Minister atana thlan tawh zingah an term, kum nga hmang tluan hi an la awm lo. PM zinga pathum chu thah an ni tawh bawk. Kum 1958-1973 chhung khan PM an nei lo a, kum 1973-a an ram danpui siamṭhat a nih hnuah Zulfikar Ali Bhutto chuan PM atana thlan tlin hmasa ber a ni.

Kum 2002-2022 chhungin Pakistan hian PM pasarih a nei hman a, an zinga he dinhmun chelh rei ber chu Yousaf Raza Gilani niin, kum 2012 khan Supreme Court chuan a thuneihna aṭang hian paihthlak a ni. Imran Khan leh a thlak tak, Nawaz Sharif-te chuan PM dinhmun hi kum li chhung chelh hman ve ve mah se, an term erawh an hmang zo hman bik lo.