Hamas demna resolution siam UN in hnawl

Gaza Strip-a Palestinian helpawl, Hamas-te chet dan demna resolution, US in a duan chu United Nations General Assembly chuan a hnawl.

US resolution siam hi Israel chuan a thlawp a, mahse UN General Assembly-a pass tur two-third majority neih a ngai a ni.

Ningania vote laknaah, resolution thlawp lamah vote 87 a tla a, pass tura vote hmuh ngai zat a hmu pha ta lo a ni. Resolution duh lo lamah vote 57 a tla a, ram 33 in vote an thlak lo a ni.

Kumin kumtawpa UN-a US ambassador a nihna aṭanga bang tur, Nikki Haley-i chuan Thawhṭanni khan member ram hrang hrangte chu lehkha thawnin, US-draft resolution chu thlawp tura ngenin, hemi chungchang hi US chuan a ngai thutak hle tih a sawi. General Assembly chuan firfiak lam hawia Hamas chetna thleng chu an dem ngei a ngai a ni, a ti.

UN-a Hamas demna resolution a tlang zawh tak loh avang hian Hamas chuan UN member ramte chungah lawmthu a sawi a, hemi rual hian Haley-i chu eng kawng pawha Israel chetdan thlawp tlatu a ni tiin a sawisel zui nghal bawk.

West Bank-a Palestinian Authority president Mahmoud Abbas pawhin resolution hnawl a ni chu lawmawm a tih thu a sawi a, "Palestinian president chuan Palestinian miten an ram tana an beihna chu dem a remti dawn lo a ni" tiin a sawi.

Gaza Strip-ah hian Palestinian mi maktaduai hnih vel an cheng a, khawmual leh tuipui aṭanga Gaza kalpawhna hi Israel chuan kum sawm chuang a dansak tawh a ni. Kum 2006 khan Gaza Strip-a parliament inthlan neihah Hamas chuan Fatah pawl an hneh a, a kum lehah pawl pahnih inkarah hian buaina nasa tak a chhuak zui a ni. Hemi hnu hian Hamas te hian Gaza Strip-ah thuneihna changin, Fatah te hian West Bank-ah ro an rel thung.

Hamas-ten Gaza Strip an lak hnu hian Isarel chuan khawmual, tuipui leh boruak aṭanga kalpawhnate chu khuahkhirhna a siam nghal a, Gaza-a chengte chu Israel rama hna an thawh khapsak zui an ni bawk. Hemi hnuah hian Egypt pawhin Gaza nena an inri-na chu a khar zui ve leh a ni.

Kalpawh theih loha hren an nih avang hian Gaza Strip-a chengte dinhmun hi a chhe hle a, mi 60% vel chuan hna thawh an nei lo a, electricity leh health service pawh a chhe hle bawk.