China-in Huawei company danbeh tumah US puh

Chinese state media chuan Canada rama Chinese technology company Huawei chief financial officer Meng Wanzhou-i man a ni chu US-in khawvela Huawei company inpharhzau zel tur dan a tumna a ni, a ti.

Kum 46 mi, Hauwei company hotu hi December 1 khan Canada ramah man a ni a, US-a thawn tum mek a ni. Meng-i man anih ni hian US President Donald Trump leh China President Xi Jinping-te chuan Buenos Aires, Argentina-ah G20 summit hmangin zanriah pawh an kil dun a ni. US official-te chuan Chinese telecom company lian hotu man tum a nih thu a hmain President Trump chuan engmah a hre lo niin an sawi.

Meng-i man a nih chungchangah hian China chuan US a inrawlhah a puh a, man a nihna chhan tak hi US leh Canada pawhin an sawichiang lo nia sawiin chhuah nghal turin a phut a ni.

Official China Daily chuan Meng-i man a nihna chhan sawifiah a ni lo a, he thil hi US-in a thawhpui ramte Huawei company thil siam hmang lo tura a nawr tumna hmanrua nia a lan thu a sawi. Huawei chu China technology company lian leh pawimawh tak a ni a, hei vang hian US chuan khawvela a inpharhzau leh a lian zel tur dan tumin a theih ang angin hma a la niin a puh.

US commerce and treasury department chuan US-in Iran leh North Korea a hrekna palzutah Huawei company hi a puh a, hei bakah US lawmaker te chuan company technology hi China sorkarin US enthlakna atan a hmang thei nia sawiin an ram himna pawh tiderthawng thei niin an lo sawi fo tawh bawk.