France protest: Vawiinah Eiffel tower khar dawn

France sorkar laka lungawi lohna lantir mek, 'yellow vest' ten vawiin hian kawngzawh huaihawt leh an tum rin a nih vangin venthawn thilah Eiffel Tower chu khar a ni dawn.

Yellow vest-te hian sorkarin fuel-a chhiah lak a tihsan duh lohna lantirin hun eng emaw chen chu kartin kartawpah nawrh an huaihawt ṭhin a ni. Nawrh huaihawtnaah hian tharum thawhnate thlengin, thil tam tak an tichhia a ni. Vawiin pawh hian nawrh an huaihawt leh rin a ni a, hei vang hian thuneitute chuan lo inven lawk nan Eiffel Tower an khar dawn bakah, Paris khawpuia dawr te pawh inkhar turin an ti a ni. Louvre leh Orsay museum te, opera house leh Grand Palais complex te pawh khar a ni bawk ang.

Prime Minister Edouard Philippe chuan Paris khawpuiah venhim hna thawk turin police officer 89,000 duty tir an ni dawn tih a sawi. PM chuan nawrh huaihawtte chu inbengdai turin a ngen bawk.

Yellow vest-te nawrh huaihawt vang hian sorkar chuan fuel chhiat a tihsanna chu a sut tawh a, mahse hetichung hian sorkar lakah lungawi lohna hi lantir chhunzawm zel a ni a, sorkar laka an thil phut hrang hrang 40 chuang an tichhuak a ni.

Nawrh huaihawt dawn vang hian vawiin-a football match neh tur eng emaw zat pawh sawn a ni a, heng zingah hian Paris leh Montpellier, Monaco leh Nice, Toulouse leh Lyon, Saint-Etienne leh Marseille inkhel turte a tel.