Sri Lanka eptuten ṭangrual sorkar din tura sawmna hnawl ; President Rajapaksa-a'n ban a tum lo tih a sawi

Sri Lanka-a eptu party-te chuan president Gotabaya Rajapaksa-a'n ṭangrual sorkar din tura a sawmna chu an hnawl.

Eptu pawlte chuan president Rajapaksa-an ṭangrual sorkar din tura a sawmna chu thil awmze nei lo a nih thu leh an rama eitur, fuel leh damdawi indaih lohna avanga mawhphurtuah ngaiin bang turin an ngen a ni.

Sri Lanka economy tlahniam zel vanga President bang tura phuttu mipui ṭhahnem takin lungawi lohna an lantir avanga ramchhunga state of emergency an puan hnuah, nimin khan a ṭum khatna atan Parliament ṭhutkhawm neih a ni. President Rajapaksa kaihhruai ṭangrual sorkar thlawptu MP 41-ten sorkar thlawpna an hnuhdawh avangin, sorkar hian majority a nei pha tawh lo. Mahse President chuan ban mai a tum lo tih a sawi a, hemi rual hian Parliament-a majority nei pha an awm chuan thuneihna chu a hlanchhawn tur thu a sawi.

Pathianni zan khan President leh Prime Minister tih loh, cabinet minister 26-te chuan an vaiin banna an thehlut a, hei hi economy lama buaina an tawh mek chinfel dan kawng ngaihtuah tura hruaitu thar ruatna tur kawng hawnna tura an tih a ni. Hemi hnu hian President chuan cabinet member kimchang zawka ruat a nih hmaa Parliament mumal taka kalpui a nih theihna atan minister thar pali a ruat nghal bawk. Mahse finance minister atan an ruat, Ali Sabry chuan lakluh a nih tukah banna a thehlut leh nghal a ni.

Ramchhunga damdawi indaih lohna lian tak an tawh mek avangin Sri Lanka chuan nimin khan health emergency puan a ni leh bawk. Lanka mipuite chuan an ramin sum lamah harsatna lian tak a tawh mekah President chhungkua chu mawhphurtuah puhin, lungawi lohna lantirin khawlaia an la pungkhawm chhunzawm reng a ni. Sri Lanka-a central bank governor Ajith Cabraal chu Thawhṭanni khan a hna aṭangin a bang tawh bawk.

Mipuiten lungawi lohna an lantir chhunzawm zel vangin internet service provider-te chu Pathianni khan social media platform Facebook, WhatsApp, Twitter leh YouTube block tir an ni a, mahse hemi ni chawhnu lamah an hlip leh nghal a ni.

South Asia ram hian eitur, fuel leh nitin khawsak mamawh indaih lohna nasa tak an tawk mek a, hei vang hian an ram pawisa hlutna tlahniam lamah record thar siamin, power cut an tawk zing hle a, kum 1948-a Britain kut aṭanga zalenna an chan hnua an ram dinhmun tlakhniam ber ṭum an tawng mek a ni. Sri Lanka chuan International Monetary Fund aṭanga ṭanpuina an dawn theih dan tur chungchangah inbiakna an kalpui mek.

India chuan Sri Lanka tan USD maktaduai 500 dang puktir leh turin thutlukna an siam a, kumin February thla khan petroleum product leina atan USD maktaduai 500 a lo puktir tawh bawk a ni.