Thla 3 chhungin inthlanpui buatsaih hman a ni lo ang : Pakistan EC

Pakistan Election Commission (PKC) chuan an ram parliament, National Assembly ṭhiah ni tawh mah se, thla thum chhunga inthlanpui buatsaih chu an hman a rinawm loh thu a sawi.

National Assembly deputy speaker-in prime minister Imran Khan rin tawk lohna motion putluh a hnawl hnuah, PM thurawn angin president Arif Alvi chuan member 342 awmna, National Assembly hi a ṭhiat zui ve nghal a ni.

Parliament ṭhiah aṭanga thla thum chhungin inthlanpui hi buatsaih tur tih ni mah se, Election Commission senior official chuan constituency-te siam ṭhat a nih avangin inthlanpui buatsaih tura inbuatsaihna atan hian thla ruk vel an mamawh dawn niin a sawi. Inthlanna atana hman tur, watermark awmna ballot paper pawh an ramah a awm loh avangin ram dang aṭanga lakluh a ngai a, hei vang hian election body hian water mark aiah 'security feature' awmna ballot paper hmanna tura dan siamṭhat a rawt bawk.