Shanghai mipui Covid test neihsak turin sipai leh doctor ṭhahnem tak tirlut

China chuan an rama khawpui lian ber, Shanghai khawpuia hri kai an pun zel avangin, hri darh tur venna atan khawpuia cheng mi maktaduai 26-te Covid-19 test neihna pui turin Thawhṭanni khan sipai leh healthcare worker sang chuang a tir lut.

Shanghai khawpuia Covid-19 test runpui kalpuinaah hian, mi ṭhenkhatte chu an chenna hmunah khawvar hmain nucleic acid test nei tura kaihthawhte an ni.

People's Liberation Army (PLA) chuan Pathianni khan army, navy leh joint logistics support forces lama medical hnathawk mi 2,000 chuangte chu Shanghai-ah hian tirhluh an nih thu a lo sawi tawh bawk.

Jiangsu, Zhejiang leh Beijing province-te chuan Shanghai-ah hian healthcare worker eng emaw zat an tirlut tawh bawk tih media report chuan tarlangin, Shanghai-ah hian test neihpui turin mi 10,000 chuang tirh luh an ni tawh. Wuhan aṭanga novel coronavirus a darh hnua China-a hri dona kawnga a hmalakna lian ber a ni. Wuhan khawpuiah khan PLA hian medical worker 4,000 chuang a tir lut a ni.

Kar liam ta Thawhṭanni aṭang khan Shanghai khawpuiah hian thawh hnihin lockdown kalpui a ni a, pawhsei zui a ni bawk. Mipuite chu pawn chhuak lo tura tih an ni a, Pathianni khan antigen test hmanga mahni in test vek turin ngen an ni.