Sri Lanka-ah damdawi tlakchham vangin doctor te'n lungawi lohna lantir

Sri Lanka rama doctor-te chuan hospital hrang hrangah damlo enkawlna tur damdawi an tlakchham avangin nimin khan an khawpui Colombo-ah lungawi lohna an lantir.

Ram economy tlachhe mek avangin Sri Lanka mipuite hian harsatna an tawk nasa tawh hle. Fuel, power leh chaw lam chi bakah, nitin khawsakna atana mamawh dang pawh an tlachham ṭan tawh a ni. Damdawi lam an tlakchham leh tak avangin doctor-te chuan an ram health system chu a tluchhe dawn tih an sawi.

Education minister leh House leader, Dinesh Gunawardena chuan, "Ramchhungah sum lama indaih lohna liantak a thleng mek tih hi kan pawm a, heng buaina aṭanga talchhuah dan kawng kan dap mek a ni," a ti. Gas, fuel leh khawnvartui la tur leh mamawh dang lei turte thui tak tak an intlar tih pawh an hmu a, mipuite harsatna tawh mek chu an hriatthiampui thu a sawi a, mahse democracy ram an nih angin muanna zawn a ngaih thu a sawi.

Nimina nawrh huaihawttu, Government Medical Officers' Association-ah hian doctor 16,000 vel an tel. Sorkar enkawl, Apeksha Hospital-a thawk Malaka Samararathna chuan kumtin an damdawi-inah chuan ram chhung hmun hrang hranga aṭanga kal, cancer vei mi sing tel an enkawl ṭhin tih a sawi. Mahse tunah chuan cancer enkawlna damdawi chauh ni lo, test neihna atan mamawh chemimal lam thlengin an indaih tawh loh tih a sawi a ni.

Sri Lanka President-in emergency order sût
President Gotabaya Rajapaksa chuan lawmaker ṭhahnem takin ṭangrual sorkar chhuahsan a, Parliament lama thuneihna an chan zawh tawh loh hnuah Thawhlehni tlai khan state of emergency a lo puan tawh chu a hlip.

Mipuiten sorkar laka lungawi lohna lantira nawrh an huaihawt avangin kar liam ta Zirtawpni khan emergency hi puan a ni.

Parliament-ah sorkar hian majority a nei zawh tawh loh avangin engtinge an awm zel dawn hriat a la ni lo a, President hian prime minister thar a ruat dawn nge, a hun hmain inthlanpui neih a ni dawn tih an la sawilang lo. Dan pangngaiah chuan an ram inthlanpui kum hi 2025-ah neih tur a ni.