China-ah Covid hri kai thar 20,000 chuang awm

China ramah nimin khan Covid-19 hri kai thar mi 20,000 chuang an awm a, Covid-19 hri hmuh chhuah anih aṭanga an rama ni khata hri kai an tam ber ṭum a ni.

China hian hri darh tur venna atan lockdown, mass testing leh international travel lama khuahkhirhnate a siam avangin March thla hma lam khan ni khata hri kai hmuh chhuah hi an tam lo ṭhin a, mahse March thla aṭang khan hri kai hi an pung chak chho hle.

National Health Commission chuan ram pumah Nilaini khan hri kai thar 20,472 an awm a, thihpui erawh an awm lo. Mahse hri kai thar zinga a tam zawk hi taksa lama harsatna nei lo, asymptomatic an ni.

Hri kai thar tamna, mi maktaduai 25 chenna Shanghai khawpuiah chuan kar liam ta aṭang khan lockdown puan a ni a, mipuite chu pawnchhuah khap an ni.