US-in Ukraine sipaite tan USD mtd 100 pe dawn

United States chuan Thawhlehni khan Ukraine-a sipaite ralthuam leina atan USD maktaduai 100 an thawn dawn tih an puang.

"President remtihna angin, Ukraine venhimna turin anti-armor system leina atan ṭanpuina sum USD maktaduai 100 pekchhuak ka remti a ni, " tiin secretary of state Antony Blinken chuan a sawi.

"Russia sipaite Bucha leh Ukraine chhehvela an chetdan chu khawvel hian mak a ti hle," tiin Pentagon thupuangtu John Kirby chuan sawiin, ṭanpuina sum chu Ukraine-in an mamawh tak Javelin anti-armor systems leina atan hman an ni ang, a ti. Ukraine hian an ram humhimna atan ralthuam chi khat shoulder-launched missiles an hman thu a sawi bawk.

April 1 khan Pentagon chuan sipai ṭanpuina turin USD mtd 300 an pekchhuah tur thu an lo tarlang tawh bawk a ni.

Kirby chuan February 24-a Russia-in Ukraine a run aṭang khan, US hian USD tluklehdingawn 1.7 chuang ṭanpuina a pe tawh a, US president Joe Biden-a'n office a luah luh aṭanga Ukraine ram ṭanpuina an pek chu USD tld 2.4 chuang a tling tawh tih a sawi.