US sipaite'n Iran general Qasem Soleimani an that

Iran general leh Iran's elite Quds Force hotupa, Qasem Soleimani chu US sipaiten an that tih Pentagon chuan a tarlang.

Iran thuthar theh­darhtute chuan nimin zingah khan Baghdad interna­tional airport bula motor-a a chuang lai chu drone mi­ssile hmangin US sipaiten hian an kap niin an tarlang a ni. He inbeihnaah hian deputy com­mander Abu Mahdi al-Muhandis pawh a thi a, Soleimani bula chuang ve midang pangate pawn an thi bawk. An chuanna motor hi missile eng emaw zatin an kap niin an sawi.

United States Department of Defense chuan thuchhuah siamin December 31, Thawhlehnia Iraq khawpui Baghdad-a US embassy Iraqi Shia paramilitary group Kata'ib Hezbollah-te'n an beihna a thlawp vangin Soleimani hi an that tih an tarlang. Nikum December 29 khan US sipaite chuan Iraq leh Syria hmuna Kata'ib Hezbollah-te lakah beihpui an thlak a, hetah hian mi 25 an thih bakah, mi 55 chuangin hliam an tuar. He thilthleng beihlet nan Kata'ib Hezbollah-te hian US embassy hi an beilet ve a ni.

Soleimani hi a thi ngei a ni tih finfiah nan US president Donald Trump chuan a twitter-ah America flag a tarlang. US chuan Middle East leh a chhehvel, a bik takin Pakistan chung zawna an thlawhtheihna chu fimkhur thuhlaah thlawk rih lo turin thupek an tichhuak nghal bawk. Pentagon chief defence sec­retary Mark Esper chuan Iraq-a US embassy an beih chungchangah Iran chu vau zuiin, beih leh an tum a nih chuan an phuba an la zel dawn tih a sawi a ni.

December 29-a US sipaite'n Kata'ib Hezbollah-te laka beihpui an thlak chungchangah khan Revolutionary Guards Commander Hossein Salami chuan Trump hi lawmman ṭha tak kan pe let ang tiin a sawi a, December 31 khan US embassy chu an beih chhunzawm ve nghal a ni. US-in Soleimani an thah chungchangah hian Iran thu­neitute chu an inhmukhawm dawn nia sawi a ni bawk.