Shanghai-a Exhibition leh Convention Center Covid damdawi-in lailawk atan siam

China-a khawpui lian ber Shanghai-ah chuan hri inkaichhawn awl tak Omicron variant vangin Covid-19 kai thar mi 17,000 chuang awmin record thar an siam. Hri kai an pun chak avangin thuneitute chuan hri kai enkawl tur lailawk, makeshift hospital siam belhna turin hma an la zel.

Tualchhunga thuneitute chuan Nilaini khan hri leng mek dinhmun thlirin an ram dinhmun chu a ṭhat loh takzet thu a sawi. Thawhlehni khan khawpuiah hian symptom nei, hri kai thar mi 311 leh natna langchhuak lo mi 16,766 an awm thar tih an sawi.

Hri kai an pun zel avangin hri kai enkawlna tur khum 79,000 aia tlem lo siam a ni tawh nia sawia ni. National Exhibition and Convention Center chu damdawi-in lailawk khum 40,000 lenna turin siamṭhat hna thawh mek a ni. Siam zawh a nih chuan Covid-19 kai enkawlna hmun lian ber ni tura beisei a ni.

Shanghai-ah hian designated hospital leh damdawi-in lailawk 10 chuang siam an ni tawh a, medical group ṭhahnem tak pawh tirhchhuah an nih thu tualchhunga thuneitute chuan an sawi.

Khawpui chhunga Lingang area-ah khum 13,600 awmna makeshift hospital-ah Thawhlehni aṭang khan hri kai natna langchhuak lote chu enkawl ṭan an ni. Nilaini zing dar 8 thleng khan, positive case mi 680 chuang dahluh an ni tawh. He biala hri kaite enkawl hna hi Shanghai, East China-a Jiangsu leh Zhejiang province aṭangin medical team pathumte'n an vil mek a ni. Shanghai medical team-ah hian Huashan Hospital-a thawk lai medical leh working staff mi 206 an awm.

Shanghai New International Expo Centre chu Covid-19 kai mi 15,000 enkawlna atan makeshift hospital atan an thawmṭha mek bawk a, Shanghai World Expo Exhibition & Convention Centre pawh makeshift hospital atana siam a nih hnuah khum 7,000 lenna tura siam a ni.

Shanghai Chongming Island-a China Flower Expo park chu khum 2,700 lenna makeshift hospital atana siam a ni tawh bawk.