Russia sipaite'n Ukraine khawpui Kyiv leh Chernihiv chhuahsan tawh : US

Ukraine khawpui Kyiv leh hmar lama Chernihiv khawpui aṭangin Russia sipaite an inhnukdawk fel tawh tih Pentagon chuan Nilaini khan a puang.

Russia sipaite hi Kyiv khawpui aṭanga inhnukdawkin, Ukraine khawchhak lamah beihpui hi an thlak chho ṭan leh tih US defence official chuan a sawi nghal bawk. Russia sipai inhnukdawkte hi mi 24,000 bawr vel an nih rin a ni. Belarus lamah kaltir an ni a, hetah hian hmun dang bei turin Russia chuan a sipaite hi a thuam chak thar leh dawn niin US intelligence chuan a sawi.

Russia hian Ukraine a run tirh aṭangin an khawpui, Kyiv hi a bitum chho nghal a, mahse hun rei tak a beih hnuah Kyiv khawpui hi Ukraine sipaite kut aṭangin a laksak thei lo a ni. Hei vang hian Kyiv lama insawrbingna chu thlakin, Donbass tia sawi - Donetsk leh Luhansk bial lam a bitum leh dawn nia sawi a ni. Donbass biala chengte chu Russia sipaite chet nat hmaa hmun him lama insawnchhuak tura hrilh a ni.