Greece-ah thil man sang duh lohna lantir

Greece-a nitin mamawh bakah kawlphetha leh in luah man sang uchuak tak avangin Nilaini khan mi 10,000 chuangin darkar 24 chhung lungawi lohna an lantir a, hei vang hian public service leh transport pawh a khaihlak phah hle.

Athens khawpuia Parliament kawta nawrh huaihawtnaah hian civil servants leh private sector worker-a labor union member 10,000 chuang an tel a ni.

Ukraine leh Russia inkar buaina hian Greece ram pawh a nghawng tawh hle a, energy leh ei tur mante chu a sang chak hle a, sumdawngte pawhin harsatna lian tak an tawk mek tih labor union chuan sawiin, an hlawh pun tur leh ṭanpuina dang zawngin sorkar an ngen.

Greece sorkar hian an ram mipuite ṭanpuina tur leh an economy siamṭhatna turin USD tluklehdingawn 4.37 a lo ruahman tawh a, mahse hei hi a la tawk lo hle tih nawrh huaihawtte chuan an sawi. "Energy leh fuel man sang avangin vawiin hian kan rawn pungkhawm a, hei hian kan eizawnna mai ni loin min dawrtute thlengin an tuar a ni. Ṭhenkhat phei chu tlachhe mai thei dinhmunah an ding a ni," tiin tax consultant Apostolos Dalas chuan a sawi.

Kum 2010 leh 2018 inkar khan Greece hian leiba tam tak a neih avangin sum leh paiah harsatna lian a lo tawk tawh a, inrenchemna pawh khauh takin an kalpui a ni. Covid-19 hri a len hma khan an ram economy pawh a rawn ziaawm chho ṭan a, mahse hri lengin harsatna a thlen zui ta a ni. Hemi hnuah Ukraine leh Russia buaina nghawng an tuar chho leh bawk a, an ram economy dinhmun pawh a ngaihtuahawm ṭan leh tawh hle a ni.