Saudi Arabia-in Turkey ngenna hnawl

Saudi Arabia chuan Saudi journalist Jamal Khashoggi thahnaa inhnamhnawiha rinhlelh, Saudi mite an rama thawn tura Turkey-in a ngenna chu a hnawl.

Saudi foreign minister Adel al-Jubeir chuan Turkey ngenna hi an hnawl thu sawiin, an ram mi leh sate thubuai ngaihtuah turin ram dangah an thawn ngai loh thu a sawi.

Kar hmasa khan Turkey President Recep Tayyip Erdogan chuan an ram chhunga Khashoggi thah a nihnaa inhnamhnawiha rinhlelhte thawn tur hian Saudi sorkar chu a lo ngen tawh a, hemi hnu hian Turkey court chuan manna thupek pawh a tichhuak bawk a ni. Court in manna tur thupek a tihchhuah hi Saudi intelligence hotu hlui Ahmad al-Assiri leh royal adviser hlui Saud al-Qahtani te lakah a ni.

Saudi pawh hian October thlaa Instanbul-a Saudi consulate-a Khashoggi thahnaa kaihhnawihah hian mi 11 chu thubuai a siamsak tawh a ni. Al-Jubeir chuan Khashoggi thahna thleng chungchang chhuinaah Turkey chet dan chu a sawisel a, court-ah finfiahna atana hman theih tur information pe tura a dilna te pawh Turkey hian tun thlengin a la pe duh lo niin a sawi.

Hetihlai hian Turkey Preident Erdogan chuan journalist Khashoggi hian Saudi lal chhungkua sawiselna lam thute a chhuah ṭhin avangin Saudi sorkar-a thuneitu sang tak lam aṭangin that tura thupek hi tihchhuah a ni, a ti. He tualthahnaah hian Crown Prince Mohammed bin Salman pawh inhnamhnawiha puh a ni a, mahse hei hi Saudi Arabia chuan a pha thung.