Yellow vest protest : Marcon-an crisis meeting ko

France sorkar laka lungawi lohna lantira Yellow Vest-te nawrh huaihawtnaa tharum thawhna a thlen chhunzawm zel avangin President Emmanuel Marcon chua crisis meeting a ko.

Yellow vest ten kar kalta Inrinni-a Paris khawpui leh khawpui hrang hranga nawrh an huaihawt chhunzawmnaah buaina nasa tak a chhuak leh a, thil tam tak an tichhe bawk a ni. Hei vang hian boruak ṭha siamna kawng zawngin President Macron chuan trade union leh employers' organisation aiawhte meeting neihpui a tum a ni. He hunah hian Prime Minister Eduard Philippe leh minister pakua an tel dawn bawk a ni.

France ramah hian fuel tax tihsan vang te, khawsakna hautak chho zel leh sorkar policy dang dang duh loh vangin yellow vest tia sawite hian kar li chhung zet nawrh an huaihawt tawh a ni. Kar kalta Inrinni khan khawpui hrang hrangah lungawi lohna lantir chhunzawm lehin, tharum thawhna hrang hrang a chhuak leh a, nawrh huaihawt zinga mi 1,200 vel zet man an ni bawk.

Paris khawpuia nawrh huaihawtte hian thil tam tak an tichhiain, tukverhte an vawm keh a, motor pawh eng emaw zat an hal bawk.

France Minister Bruno Le Maire chuan tharum thawhna thleng hi sumdawnna leh economy tan a pawi hle niin a sawi. Labour Minister Muriel Penicaud pawhin buaina chawk chhuaktute laka sorkar hma lak dan tur pawh puan thuai a ni dawn tih a sawi.

Kar hmasa khan yellow-vest movement hruaitute nena an inbiak hnuah sorkar chuan fuel tax tihsanna chu hman a ni dawn hrih lo tih a puang a ni. Mahse hetichung hian sorkar policy dang dangah lungawi lohna lantirin nawrh hi huaihawt chhunzawm zel a ni.