Tel Aviv-a inkahna thlengah mi 2 thi, mi 10 in hliam tuar

Israel khawpui Tel Aviv-a Ningani zana silaia inpawng kahna thlengah mi pahnih an thi a, mi 10 in hliam an tuar a ni. Thite hi mipa pahnih, kum 28 leh 27 an ni a, hliam tuar zinga mi palite chu dinhmun ngaihtuahawm takah an awm mek bawk.

Pawikhawihtu nia rinhlelh hi Israel police-te'n ngawrh taka an zawn hnuah nimin zing khan Jaffa mosque bulah an kaphlum. "Tel Aviv-a firfiak ralthuam kengtu chu hmuh a ni tawh a, boruak pawh bengdaih a ni tawh a ni," tiin silai hmetpuaktu hi West Bank lama Palestinian mi a nih thu leh, amah bak chu pawikhawihnaa rinhlelh dang an awm loh thu official-te chuan an sawi.

Tel Aviv police commander Amichai Eshed chuan bar-a mi tam hun lai, zan dar 9 vel bawrah silai hi hmetpuakin a tlanchhe zui nghal a ni, a ti. Pawikhawihna thlen chhan hi chiang taka hriat chhuah ni lo mah se, tun hnaiah Palestinian-ten Israel mi 11 an thah avangin boruak hi a ṭang hle a ni. March 22 khan, Israel mi palite chu Be’er Sheva-ah chemtea vih hlum an ni a, ni nga a liam hnuah Hadera-a inkahna thlengah border police officer pahnihte chu thah an ni leh bawk. March 30 khan, Israel mi pahnih, Ukraine-a cheng pahnih leh police officer pakhat chu Bnei Brak inkahnaah an thi leh a ni.

Prime minister Naftali Bennett chuan thil thleng hi Tel Aviv-a Israel military headquarters aṭangin uluk takin a thlithlai reng tih a office chuan a sawi. Defence minister Benny Gantz leh official dangte nen nimin khan venhimna kawnga an hmalak dan turte an sawiho nghal bawk.

America leh Europe ram palaite chuan Ningania Israel-a inkahna thleng chu an dem thu an sawi. US secretary of state Antony Blinken chuan US-in pawikhawihna thlenna hmun chu uluk taka an thlithlai reng thu leh, Israel lam nen pawh inbe pawh rengin, firfiaka chetna leh tharum thawna do letna kawngah an thlawp zel dawn tih a sawi.