UN-in human rights body aṭangin Russia hrem Russia-in banna a thehlut zui nghal

United Nations General Assembly chuan Ningani khan Russia chu Ukraine rama pawikhawihna a thlen vang leh, human rights a bawhchhiat vangin U.N. Human Rights Council aṭangin a hrem a, mahse a hnu lawkah Russia hian banna a thehlut zui ve nghal.

US thlawp zawnga Russia paihthlak duh ram 93 an awm a, ram 24 dangte chuan an thlawp lo a, ram 58 te chu vote laknaah an hai thung. Human Rights Council aṭanga Russia hrem tur hian vote tla aṭanga hmun thuma ṭhen ahmun hnih hmuh phak a ngai a ni.

Vote thlak hnua thu a sawiah, Russia deputy UN Ambassador Gennady Kuzmin chuan an hmalakna chu "dan lo leh politics taka chetna" tihin a puh a, Russia chu Human Rights Council aṭanga an inhnuhdawh nghal tur thu a sawi zui bawk.

Russia hian kum thum term turah a kum hnihna a hmang mek. Ningania Russia hremna resolution siam hmang hian, General Assembly chuan hremna hi a hnuah a titawp leh thei a ni. Mahse Russia-in banna a thehluh zui tak avangin hremna tihtawp pawh hian awmzia a nei dawn ta lo a ni.

Kum 2018 khan US chuan Human Rights Council hi Israel laka inthliarna kalpui leh, insiamṭhat tum lo nia puhin a lo bansan tawh bawk. Mahse nikum khan council member atan thlan a ni leh a ni.