Pakistan PM-in fiahna a paltlang zo lo

Pakistan eptu party ṭangrualten prime minister Imran Khan rin tawk lohna motion an putluah nimin zingah khan an ram parliament, National Assembly (NA)-ah vote lak a ni a, PM Khan chuan fiahna hi a paltlang zo ta lo.

PM rin tawk lohna motion-a vote an lakah hian member 342 awmah motion thlawp lamah member 174 in a vote a ni.

March 28 khan eptu party-te chuan NA-ah hian PM Khan rin tawk lohna motion hi an pu lut tawh a, April 3 khan, National Assembly deputy speaker chuan Pakistan sorkar paihthlak tumna kawngah hian ramdangte chu lo inrawlh veah puhin no-confidence motion hi a lo hnawlsak a ni. Mahse eptute hi Supreme Court-ah an zualko a, Ningani liam ta khan court chuan deputy speaker chet dan chu ram danpui bawhchhiatna a ni tiin, Natoinal Assembly chu session nei a, no-confidence motion-ah vote la turin Inrinni khan a hriattir leh ta a ni.

Supreme Court thupek angin nimin khan NA session hi neih a ni a, speaker Asad Qiaser a ban avangin rorel inkhawm hi Sardar Ayaz Sadiq-a'n a kaihruai a, vote lak a ni ta a ni. Vote laknaah hian Imran Khan-a party, rorellai Pakistan Tehreek-e-Insaf (PTI) member-te chuan vote thlak loin vote thlak dawn hian House aṭangin an chhuak.

Ram dan leh kalphung angin, house chuan no-confidence motion result hi President pawmpui tura a thawn hnuah, prime minister thar thlanna nei turin phalna an dil zui ang.