China-in Covid-19 hri vanga thinhrik duh lo

US-in an rama Covid-19 hri leng chu China thiam loh a nih thu leh he hri hi China siam tia a puh fo avangin China chuan a lawm lo hle a, dawt hmanga inpuh tawnna chu titawp turin a ti.

China foreign ministry thupuangtu Zhao Lijian chuan an ram media-te a kawmnaah, White House trade advisor Peter Navarro chuan China chu Covid-19 hri leng chungchangah a puh chhiat fo avangin leh an rama hri leng hi China thiam loh tia a puh fo avangin, thudik leh science thilte chu pawm ngam turin a chah. 

Navarro-a'n Covid-19 hri vanga China thinhrikna thu a sawi fo chu Lijian chuan a kham thu a sawi bawk a ni. "Hri leng ṭan tirh khan China chuan theihtawpin invenna kawngah hma a la nghal a, Hubei khawpui Wuhan-a hri a darh tir January 23 khan inkalpawhna zawng zawng chu khar a ni. Hetih lai hian US-ah chuan hri kai mi pakhat chiah a la awm. January 31 khan US leh China thlawhtheihna lian pathum chu hri leng laka inven nan tihtawp lailawk a ni a, February 2 khan US chuan China tan a ramri a khar a ni. Hetih lai hian US-ah chuan hri kai mi 10 ai tam an awm tawh," tiin Lijian chuan thil awmdan a sawi chhuak. 

"January 24 aṭanga April 8 khan Wuhan-ah khirh taka lockdown kalpui a ni a, kha mi hun chhung khan thlawhtheihna leh rel engmah Wuhan aṭangin China ram hmun dang emaw ram pawnah emaw a chhuak lo. April 8 khan US-a hri kai hi mi 4,00,000 vel an awm tawh a, tunah chuan mi maktaduai 2.87 in an kai tawh a ni. He hri vanga US-a thi hi mi 1,30,000 dawn an awm tawh bawk. Hun rei lote chhungin China chuan he hri hi a thunun thei a, a thunun theihna pawh uluk tak leh hmalakna ṭha zawk hmanga hri leng a do vang a ni," tiin Lijian chuan US chu hri dona kawnga hmalakna tak tak nei loah a puh bawk a ni.