US-in Covid-19 vaccine December-ah hman theih beisei

United States sorkara vaccine lama thuneitu Dr Moncef Slaoui chuan Covid-19 vaccine enchhinna an neih mek chu pawmpuina hmuh a nih theih chuan December 11 emaw 12 velah emaw  hman theih a nih a rin tawh thu a sawi.

Pharmaceutical company Pfizer leh Biotechnology company BioNTech chuan Covid-19 vaccine an siam chu Food and Drug Administration (FDA) aṭanga emergency atana hman phalna an hmuh theih chuan ni reilote hnuah hman mai theih a nih tur thu Dr Slaoui chuan a sawi. Heng company-te hian preliminary trial an nei tawh a, he trial an neihnaah hian 95% chu a hlawhtling a ni.

Hemi chungchangah hian FDA vaccine adviser-te chuan December 8-10 chhung hian  meeting an nei dawn a, meeting-ah hian Covid-19 vaccine chu emergency atan hman rem a tihsak chuan December 11 emaw 12-ah chuan vaccine chu hman theih a rin thu Dr Slaoui chuan a sawi. 

Kar liam ta Zirtawpni khan US-a hri kai thar chuan mi 1,90,000 an pel a, a tuk Inrinniah damdawi-ina hri kai dah luh chu mi 83,000 chuang an awm bawk. US-a hri kai hmuh chhuah tawh hi maktaduai 12 an chuang tawh tih Johns Hopkins University chuan a tarlang.

US-a hri vanga thi hi 2,62,701 an tling tawh bawk a, hri kai thar leh hri vanga thi an pun chak leh tak avangin state hrang hrangah inkhuahkhirhna  hman a ni.

UN children agency, United Nations Children's Fund (UNICEF) chuan mam­moth operation kaltlangin nakkumah ram rethei zawkah (developing country) Covid-19 vaccine tluklehdingawn hnih dawn chu a pe dawn. 

UNICEF chuan nimin khan vaccine a pek tur phurh thlen a nih theih nan hian airlines 350 chuang leh freight company-te a thawhpui thu a tarlang a, World Health Organization (WHO)-in Covid-19 vaccine Covax chungchanga a hmalakna zingah hian syringe tluklehdingawn khat chu ram rethei zawk Burundi, Afghanistan leh Yemen-ah thawn a nih dawn thu pawh UNICEF chuan a tarlang bawk. 

UNICEF-a supply division director Etleva Kadilli chuan thawhhona ṭha tak neih chu vaccine siama phurh chhuah a nihna turah a pawimawh dawn hle tih a sawi. 

Covax peihfel a nih theih nana hmalatu WHO, GAVI vaccine group leh Coalition for Epidemic Preparedness Innovation-te chuan vaccine hi siam chhuah a nih huna rualkhai taka sem a nih theih nan hma an la mek a ni.

Kar liam ta Inrinnia neih, G20 summit-ah khan vaccine chu peihfel a nih hunah ram hrang hrangteah rualkhai taka semchhuah a nih theih dan turte sawiho a ni. Kadilli chuan vaccine peihfel thuai a nih theih nan hian tute pawh thawhho a pawimawh thu sawiin,  peihfel a nih huna a dose insem dan tur te, syringe sem dan turte leh frontline worker-te hman tur personal protective equipment insem  dan tur te chu thawhhona ṭha tak hnuai kalpui theih a nih thu pawh a sawi bawk.

Pfizer Inc leh BioNTech chuan an vaccine chu US-a emergency atan hman tur chuan a him tawk tih an tarlang a, Europe-a thuneitute chuan thla tharah hian an vaccine enchhinna neih mek chu enchhinna tawp ber an thlen tawh dawn thu an tarlang ve bawk. 

Hei bakah hian Moderna Inc chuan kar liam ta khan an preliminary data tichhuakin an vaccine chu 94.5% in a rintlak thu an talang.